दयानंद विज्ञानमध्ये रसायनशास्त्र क्रॉसवर्ड कोडी स्पर्धेचे बक्षीस व प्रमाणपत्र वितरण

लातूर : दयानंद विज्ञान महाविद्यालयाच्या रसायनशास्त्र विभागाच्या वतीने क्रॉसवर्ड कोडी स्पर्धेचे आयोजन करण्यात आलेले होते.या स्पर्धेसाठी एकूण ५६ विद्यार्थ्यांनी नाव नोंदणी केलेली होती; त्यापैकी पदवी व पदव्युत्तर स्तरावरील एकूण ५० विद्यार्थ्यांनी उत्स्फूर्तपणे सहभाग नोंदविला.या स्पर्धेचा मुख्य उद्देश विद्यार्थ्यांना रसायनशास्त्र विषयाविषयी गोडी निर्माण करणे,त्यांना अधिक माहिती देणे आणि त्यांच्या बौद्धिक कौशल्याला चालना देणे हा होता.स्पर्धेत विद्यार्थ्यांनी विविध संकल्पना आणि संज्ञांचा उपयोग करून उत्तरे दिली.

सदरील स्पर्धा परीक्षेत एम.एस्सी.प्रथम वर्षातील अनुष्का कुलकर्णी या विद्यार्थीनीने प्रथम क्रमांक पटकाविला तर एम.एस्सी.द्वितीय वर्षातील सना गाडीवान या विद्यार्थीनीने द्वितीय क्रमांक मिळविला व एम.एस्सी.प्रथम वर्षातील तृप्ती कुलकर्णी या विद्यार्थीनीने तृतीय क्रमांक मिळविला.प्रथम,द्वितीय व तृतीय क्रमांक मिळविलेल्या विद्यार्थीनींना अनुक्रमे रु ३५१/-, ३०१/- व २५१/- रोख रक्कम व प्रमाणपत्र महाविद्यालयाचे प्र.प्राचार्य डॉ.सिद्धेश्वर बेल्लाळे यांच्या हस्ते देवून यशस्वी विद्यार्थ्यांचा सत्कारही करण्यात आला.दि.०४ मार्च २०२५ रोजी आयोजित करण्यात आलेल्या या बक्षीस व प्रमाणपत्र वितरण कार्यक्रमाचे आयोजन समन्वयक प्रा.डॉ.नंदा कोरडे व सहसमन्वयक प्रा.विठ्ठल सोनकांबळे यांनी केले.

याप्रसंगी रसायनशास्त्र विभाग प्रमुख डॉ.युवराज सारणीकर,आयक्यूएसी समन्वयक डॉ.जमन अंगुलवार, पदव्युत्तर समन्वयक डॉ.श्रेयस माहुरकर,प्रा.अक्षता माने,प्रा.मनीषा मुंडे,प्रा.भाग्यश्री काळे यांच्यासह इतर प्राध्यापक शिक्षकेत्तर कर्मचारी व विद्यार्थी उपस्थित होते.कार्यक्रमाचे सूत्रसंचालन समन्वयक डॉ.नंदा कोरडे यांनी केले तर आभार प्रा.विठ्ठल सोनकांबळे यांनी मानले.