सप्तरंगी साहित्य मंडळाचे कार्य स्पृहणीय - डॉ. राम वाघमारे

नांदेड - सप्तरंगी साहित्य मंडळाच्या वतीने विविध उपक्रम राबविण्यात येत असतात. भारतीय संविधानाच्या अमृत महोत्सवी वर्षानिमित्त शहरातील अनेक दैनिक वृत्तपत्र कार्यालयास भारतीय संविधानाची प्रत भेट देण्याचा उपक्रम अत्यंत स्तुत्य असून सप्तरंगी साहित्य मंडळाचे हे कार्य स्पृहणीय असल्याचे मत येथील साहित्यिक डॉ. राम वाघमारे यांनी व्यक्त केले. दैनिक सत्यप्रभा वृत्तपत्र कार्यालयास सप्तरंगी साहित्य मंडळाच्या वतीने संविधानाची भेट देली तेव्हा ते बोलत होते. यावेळी दैनिक सत्यप्रभाचे संपादक संतोष पांडागळे, साहित्यिक डॉ. राम वाघमारे, सप्तरंगी साहित्य मंडळाचे राज्य कार्याध्यक्ष साहित्यिक समीक्षक प्रज्ञाधर ढवळे, शाहीर आ. ग. ढवळे, पत्रकार भैय्यासाहेब गोडबोले, कवी थोरात बंधू यांची उपस्थिती होती.

भारतीय संविधानाच्या अमृत महोत्सवी वर्षानिमित्त शहरातील विविध दैनिकांच्या कार्यालयास भारतीय संविधानाची प्रत भेट देऊन येथील सप्तरंगी साहित्य मंडळाच्या वतीने संविधानाची पंच्याहत्तरी साजरी करण्यात येत आहे. सप्तरंगी साहित्य मंडळाच्या वतीने लोकशाहीचा चौथा स्तंभ म्हणून कार्यरत असणाऱ्या शहरातील दैनिक वृत्तपत्र कार्यालयास एक भारतीय संविधानाची प्रत भेट देण्याचा निर्णय मंडळाच्या बैठकीत घेण्यात आला. भारतीय संविधान स्वतः प्रत अर्पण होण्याच्या घटनेला ७५ वर्षे पूर्ण झाली आहेत. या अमृत महोत्सवी वर्षाच्या औचित्याने सप्तरंगी साहित्य मंडळाच्या वतीने शहरातील दैनिक सत्यप्रभा कार्यालयास भारतीय संविधानाची प्रत भेट देण्यात आली. ही प्रत संपादक संतोष पांडागळे यांनी स्विकारली. आत्तापर्यंत दैनिक लोकमत, प्रजावाणी, सकाळ, एकमत, देशोन्नती या वृत्तपत्र कार्यालयांना भारतीय संविधानाची प्रत भेट देण्यात आली आहे.