लाडक्या बहिणाचा हप्ता बँकेच्या खात्यावर जमा होऊ लागला

चाकुर ता.प्रः-
मुख्यमंत्री माझी लाडकी बहीण योजनेमुळे महायुती सरकारला विधानसभा निवडणुकीत मोठे यश मिळाले. त्यामुळे या योजनेच्या माध्यमातून येणारा हप्ता नियमीतपणे लाडक्या बहिणींच्या खात्यात जाणे, ही मोठी जबाबदारी मुख्यमंत्री देवेंद्र फडणवीस आणि त्यांच्या सरकारवर आहे. लाडक्या बहिणींच्या बँक खात्यात आजपासून डिसेंबरचा हप्ता जमा होण्यास सुरुवात होणार आहे.
मुख्यमंत्री देवेंद्र फडणवीस यांनी हिवाळी अधिवेशनात भाषण करताना अधिवेशन संपल्यानंतर लाडक्या बहिणींच्या खात्यात रक्कम जमा केली जाईल, असे म्हटले होते. त्यानुसार, या प्रक्रियेला आजपासून सुरुवात होणार आहे. त्यामुळे नववर्षाच्याआधीच लाडक्या बहिणींना आनंदवार्ता मिळणार आहे. मुख्यमंत्री माझी लाडकी बहीण योजनेचा डिसेंबर महिन्याचा हप्ता दोन टप्प्यात दिला जाणार आहे. पहिल्या टप्प्यात २ कोटी ३५ लाख महिलांना १५०० रुपयेप्रमाणे डिसेंबरचा हप्ता मिळणार आहे. तर, विधानसभा निवडणूक जाहीर होण्यापूर्वी अखेरच्या टप्प्यात महिला व बाल कल्याण विभागाकडे २५ लाख महिलांचे अर्ज आले होते. त्या अर्जाची स्क्रूटिनी राहिली असल्याने ती पूर्ण करून या महिलांना देखील डिसेंबरचा हप्ता दुसऱ्या टप्प्यात दिला जाईल, अशी माहिती समोर आली आहे. महत्त्वाची बाब म्हणजे, महायुतीने विधानसभा निवडणुकीचा प्रचार करताना लाडकी बहीण योजनेची रक्कम १५०० रुपयांवरुन २१०० रुपये करण्याचे आश्वासन दिले होते. त्यानुसार २१०० रुपये कधीपासून मिळणार? याकडे सर्वांचे लक्ष लागले आहे. मात्र, डिसेंबरचा हप्ता १५०० रुपयांप्रमाणे मिळणार आहे. पण देवेंद्र फडणवीस यांनी मुख्यमंत्रिपद स्वीकारल्यानंतर अर्थसंकल्पात याबाबत निर्णय घेतला - जाईल, असे म्हटले होते.