महाधम्मध्वज महापदयात्रेत लाखोच्या संख्येने सहभागी व्हा - दीपक कदम

नांदेड - नवीन वर्षाच्यानिमित्ताने आणि महाधम्मध्वज महापदयात्रा नियोजनाच्या पार्श्वभूमीवर आंबेडकरवादी मिशनचे प्रमुख दीपक कदम यांनी तालुक्यातील खुरगाव नांदुसा परिसरातील श्रामणेर प्रशिक्षण केंद्रास भेट देऊन चालू असलेल्या धम्मसंकल्प इमारत म्हणजेच श्रामणेरांच्या दीक्षाभूमीच्या बांधकामांची पाहणी केली. यावेळी अखिल भारतीय भिक्खू संघाचे जिल्हाध्यक्ष भदंत पंयाबोधी थेरो यांच्यासह भिक्खू संघाची उपस्थिती होती. यावेळी श्रामणेर प्रशिक्षण केंद्राच्या वतीने आयोजित करण्यात आलेल्या महाधम्मध्वज महापदयात्रेत बुधवारी ८ जानेवारी २०२५ रोजी तमाम बौद्ध उपासक उपासिकांनी मोठ्या संख्येने उपस्थित राहावे असे आवाहन कदम यांनी केले.

ऋषिपठण बहुउद्देशीय सेवाभावी संस्था अंतर्गत श्रामणेर प्रशिक्षण केंद्र परिसरात विपश्यना केंद्र, पुस्तकालय तथा वाचनालय, भिक्खू निवास, भव्य भोजन कक्ष आदींचे बांधकाम सुरू आहे. या ठिकाणी सुरू असलेल्या बांधकामाची पाहणी दीपक कदम यांनी केली. अल्पावधीमध्ये बेसमेंट लेव्हलपर्यंत काम करण्यात आले आहे, लवकरच पहिल्या स्लॅब चे काम करण्यात येईल असे यावेळी भदंत पंयाबोधी थेरो यांनी सांगितले. हे काम भव्य दिव्य असून खर्चाचा विचार करता समाजातील बांधवांनी योगदान देण्यासाठी पुढे यावे असे आवाहन दीपक कदम यांनी केले. यावेळी आंबेडकरवादी मिशनच्या माध्यमातून होत असलेल्या अतुलनीय कामगिरीबद्दल कदम यांचा श्रामणेर प्रशिक्षण केंद्राच्या वतीने भव्य सत्कार करण्यात आला.