भाषा टिकली तरच संस्कृती टिकते - सुप्रसिद्ध कवी योगीराज माने

लातूर : मराठी ही महाराष्ट्राची मातृभाषा असून अभिजात मराठी भाषेचे वैभव व मराठी साहित्याचे दालन अत्यंत समृद्ध आहे.अशा या मराठी भाषेवर प्रेम करायला शिका.कारण आज बदलत्या जीवनशैलीमुळे माणूस बदलला व निसर्गही बदलला आहे.म्हणून युवा पिढींनी भाषेबरोबर आईबाप,भाऊ-बहीण व सर्व नातेवाईकांवरही प्रेम केले पाहिजे.आयुष्यात कलेची जोपासना केली पाहिजे.कारण कलासक्त व कलेवर प्रेम करणाऱ्या माणसाचं जगणं सोपं असतं.म्हणूनच कला व काव्य जपलं की जगणं आपोआप सुंदर होतं.संवेदनशील कवी आपली भावना अशी व्यक्त करतो की,

" नकली चेहऱ्यांची गर्दी आजूबाजूला

खराखुरा माणूस भेटावा एकदा तरी

मळा भक्तीचा असा फुल दे ह्रदयामध्ये

तुला भेटण्या विठ्ठल यावा एकदा तरी "

प्रेमाने भरलेला माणूस वाट्याला यावा असे प्रत्येकांचे आचरण असावे.माणूस व माणुसकी,देशभक्ती आणि भाषेची जोपासणा करावी.भाषा टिकली तरच संस्कृती टिकते,असे प्रतिपादन सुप्रसिद्ध कवी योगीराज माने यांनी केले.

येथील दयानंद विज्ञान महाविद्यालयात दि.२८ जानेवारी २०२५ रोजी भाषा विभाग व राष्ट्रीय सेवा योजना विभागाच्या संयुक्त विद्यमाने आयोजित ' कवितेचं गाव ' या काव्यगायन व मार्गदर्शनपर कार्यक्रमाचे आयोजन करण्यात आलेले होते.यावेळी प्रमुख पाहुणे म्हणून त्यांनी आपल्या ' पाऊस ',' बाप माझा ',' गुरु माझा ',' आभाळाला स्पर्श करावा ',' सखी माझी ' व ' माझी मुलगी ' अशा विविध कविता व गझलांच्या माध्यमातून विद्यार्थ्यांना मंत्रमुग्ध केले.कार्यक्रमाच्या अध्यक्षस्थानी महाविद्यालयाचे प्राचार्य डॉ.सिद्धेश्वर बेल्लाळे होते.याप्रसंगी कार्यक्रमाचे आयोजक इंग्रजी विभाग प्रमुख प्रा.मेघा पंडित,हिंदी विभाग प्रमुख डॉ.गजानन बने,मराठी विभाग प्रमुख डॉ.रामशेट्टी शेटकार,रासेयो कार्यक्रमाधिकारी डॉ.सुरज कोल्हे व डॉ.अमोल ठोसर यांची प्रमुख उपस्थिती होती.

अध्यक्षीय समारोप करताना प्राचार्य डॉ.सिद्धेश्वर बेल्लाळे असे म्हणाले की,मराठी भाषा आपल्या संस्कृतीचा गाभा असून तिच्यामुळे परिवार,समाज व संस्कृती टिकते.आज मराठी भाषेवर इतर भाषांचे आक्रमण फार मोठ्या प्रमाणात होत आहे.अशा या काळात मराठी भाषेचे जतन व संवर्धन केले पाहिजे.

प्रास्ताविक प्रा.मेघा पंडित यांनी केले तर आभार डॉ.सुरज कोल्हे यांनी मानले.प्रमुख पाहुण्याचा परिचय डॉ.रामशेट्टी शेटकार यांनी करून दिला.सूत्रसंचालन शिवाणी छत्रबंद व आकांक्षा मिनियार यांनी संयुक्तरित्या केले.याप्रसंगी ग्रंथपाल प्रा.किरण भिसे,डॉ.मनीषा गुरमे,डॉ.प्रमोद माने,प्रा.सुरेंद्र स्वामी,राजसाहेब पांचाळ,सुनील राक्षे यांच्यासह इतर प्राध्यापक,शिक्षकेत्तर कर्मचारी व विद्यार्थी बहुसंख्येने उपस्थित होते.