संविधानाचा सन्मान करण्याचे आणि अभिमान बाळगण्याचे वर्ष - मारोती कदम

नांदेड - सप्तरंगी साहित्य मंडळाच्या वतीने वर्षभर विविध उपक्रम राबविण्यात येत असतात. भारतीय संविधानाच्या अमृत महोत्सवी वर्षानिमित्त शहरातील अनेक दैनिक वृत्तपत्र कार्यालयास भारतीय संविधानाची प्रत भेट देण्याचा उपक्रम सुरू आहे. हे वर्ष भारतीय संविधानाचा सन्मान करण्याचे आणि अभिमान बाळगण्याचे आहे असे प्रतिपादन स्तंभलेखक मारोती कदम यांनी व्यक्त केले. दैनिक गोदातीर वृत्तपत्र कार्यालयास सप्तरंगी साहित्य मंडळाच्या वतीने संविधानाची भेट देली तेव्हा ते बोलत होते. यावेळी दैनिक गोदातीरचे उपसंपादक मनोहर कदम, जाहिरात व्यवस्थापक रामदास पांचाळ, फुले आंबेडकरी विचारवंत बालाजी थोटवे, बीपीएसएसचे राष्ट्रीय अध्यक्ष एस. जी. माचनवार, सप्तरंगी साहित्य मंडळाचे संस्थापक अध्यक्ष अनुरत्न वाघमारे, राज्य कार्याध्यक्ष साहित्यिक समीक्षक प्रज्ञाधर ढवळे, कवी थोरात बंधू, सूनील दवणे यांची उपस्थिती होती.

भारतीय संविधानाच्या अमृत महोत्सवी वर्षानिमित्त शहरातील विविध दैनिकांच्या कार्यालयास भारतीय संविधानाची प्रत भेट देऊन येथील सप्तरंगी साहित्य मंडळाच्या वतीने संविधानाची पंच्याहत्तरी साजरी करण्यात येत आहे. सप्तरंगी साहित्य मंडळाच्या वतीने लोकशाहीचा चौथा स्तंभ म्हणून कार्यरत असणाऱ्या शहरातील दैनिक वृत्तपत्र कार्यालयास एक भारतीय संविधानाची प्रत भेट देण्याचा निर्णय मंडळाच्या बैठकीत घेण्यात आला. भारतीय संविधान स्वतः प्रत अर्पण होण्याच्या घटनेला ७५ वर्षे पूर्ण झाली आहेत. या अमृत महोत्सवी वर्षाच्या औचित्याने सप्तरंगी साहित्य मंडळाच्या वतीने शहरातील दैनिक गोदातीर कार्यालयास भारतीय संविधानाची प्रत भेट देण्यात आली. ही प्रत उपसंपादक मनोहर कदम व रामदास पांचाळ यांनी स्विकारली. आत्तापर्यंत दैनिक लोकमत, सत्यप्रभा प्रजावाणी, सकाळ, एकमत, देशोन्नती या वृत्तपत्र कार्यालयांना भारतीय संविधानाची प्रत भेट देण्यात आली आहे.