राज्य शासनाच्या विरोधात पत्रकारांचे निदर्शने

लातूर- सरकारने मीडिया मॉनिटरिंग खाजगी संस्थेकडे देण्याच्या निर्णया विरोधात महाराष्ट्र राज्य पत्रकार संघ, मुंबई जिल्हा शाखा लातूरने महात्मा गांधी यांच्या पुतळ्याला पुष्पहार अर्पण करत काळ्याफिती बांधून निदर्शने केली व यावेळी राज्य शासनाचा त्या निर्णयाच्या विरोधात घोषणाबाजी करत निषेध व्यक्त केला.

महाराष्ट्र सरकारने वृत्तवाहिन्या, वृत्तपत्रे आणि डिजिटल माध्यमांवरील बातम्यांचे संकलन व विश्लेषण करण्याचे काम खासगी संस्थेला देण्याचा निर्णय घेतला आहे.पत्रकारितेचा मुख्य हेतू जनतेपर्यंत सत्य व वस्तुनिष्ठ माहिती पोहोचवणे हा आहे मात्र, सरकारकडून या कामासाठी खासगी संस्था नेमण्याचा निर्णय घेतल्याने बातम्यांवर अप्रत्यक्ष सेन्सॉरशिप लादली जाण्याचा धोका आहे. हा निर्णय सरकारविरोधी मतप्रवाह दडपण्याचा आणि प्रसारमाध्यमांवर अंकुश ठेवण्याचा प्रयत्न असल्याचे दिसते, असे पत्रकार संघाचे प्रदेश उपाध्यक्ष तथा जिल्हाध्यक्ष अशोक देडे मत व्यक्त केले.

यावेळी महाराष्ट्र पत्रकार संघांचे प्रदेश उपाध्यक्ष अशोक देडे, जिल्हा सरचिटणीस अशोक हणमंते, शहराध्यक्ष महादेव डोंबे, जिल्हा संघटक सुधाकर फुले, जिल्हा उपाध्यक्ष लिंबराज पन्हाळकर, पत्रकार नेताजी जाधव, शिवाजी कांबळे, इले.प्रमुख शेख खय्युम, हरून मोमीन,रेणापूर तालुकाध्यक्ष शरद राठोड, विकास कांबळे, अरुण कांबळे, सुनील गुडे आदी सर पत्रकार बांधव उपस्थित होते.