महात्मा बसवेश्वर महाविद्यालयाचे प्राचार्य डॉ. संजय गवई यांचा सत्कार

श्री महात्मा बसवेश्वर शिक्षण संस्था, लातूर द्वारा संचलित महात्मा बसवेश्वर महाविद्यालयाचे प्राचार्य डॉ. संजय गवई यांना भारतीय दलित पॅंथरच्यावतीने दिला जाणारा पहिला राज्यस्तरीय शीलरत्न पुरस्कार २०२४ जाहीर झाला आहे.

त्यानिमित्ताने त्यांचा श्री महात्मा बसवेश्वर शिक्षण संस्थेचे अध्यक्ष आदिनाथ सांगवे यांच्या हस्ते सन्मान करण्यात आला, यावेळी संस्थेचे संचालक राजेश्वर बुके, संचालक प्रा. जी. एम. धाराशिवे, प्रमुख वक्ते भारत सातपुते, मुख्य समन्वयक डॉ. भाकररेड्डी नल्ला, उपप्राचार्य प्रा. संजय पवार आणि डॉ. रत्नाकर बेडगे यांची प्रमुख उपस्थिती होती.

भारतीय दलित पॅंथरचे संस्थापक अध्यक्ष अंबादास शिंदे व छत्रपती शिवरायांचे तेरावे वंशज तथा महाराष्ट्राचे प्रदेशाध्यक्ष फत्तेसिंह राजे भोसले यांनी या पुरस्काराची घोषणा नुकतीच केली आहे.

हा पुरस्कार वितरण सोहळा प्रजासत्ताक दिनी रविवार दि. २६ जानेवारी २०२५ रोजी दु. ३.३० वाजता श्रावस्ती बुद्ध विहार, विक्रम नगर, लातूर येथे दिला जाणार आहे. या कार्यक्रमाच्या अध्यक्षस्थानी प्राचार्य डॉ. श्रीकांत गायकवाड हे उपस्थित राहणार असून दलित पॅंथरचे राज्य उपाध्यक्ष डी. एस. नरसिंगे, बीड जिल्हाध्यक्ष वैजनाथ गायकवाड, अॅड. लक्ष्मण शिंदे (बीड) प्रा. एस. आर. हावळे, प्रा. बापू गायकवाड आणि विलास घारगावकर यांच्या उपस्थितीमध्ये सन्मानचिन्ह, मानपत्र आणि शाल असे या पुरस्काराचे स्वरूप आहे.

देशातील पिढीतांवरील अन्यायाचा प्रतिकार आदर्श प्रतिकार करण्यासाठी महाराष्ट्रातील बहुजन समाजातील सुमारे ६०० पेक्षा अधिक ज्येष्ठ पॅंथरनी दि. ३ ऑगस्ट २०२३ रोजी भारतीय दलित पॅंथरचे पुनर्जीवन केले असून सध्या महाराष्ट्रात तिचे कार्य चालू आहे यामध्ये समाजातील चारित्र्यवान, नीतिमान आणि विशेषत: शील संपन्न व्यक्तीला समाजासमोर आदर्श रूपाने उभे करण्यासाठी त्यांना शील रत्न राज्यस्तरीय पुरस्कार देण्याचा विचार पुढे आला आणि या पहिल्याच राज्यस्तरीय शील रत्न पुरस्कार २०२४ साठी महात्मा बसवेश्वर महाविद्यालयाचे प्राचार्य डॉ. संजय दुर्वासराव गवई यांची सर्वानुमते निवड करण्यात आली.

प्राचार्य डॉ. संजय गवई हे जून २००० पासून महाविद्यालयाच्या समाजकार्य विभागामध्ये प्राध्यापक म्हणून कार्यरत असून नुकतीच श्री महात्मा बसवेश्वर शिक्षण संस्थेचे सन्माननीय संस्था पदाधिकारी यांनी त्यांना दि. ०६ जुलै २०२३ रोजी प्रभारी प्राचार्य पदाची जबाबदारी दिली आणि ती जबाबदारी छत्रपती शिवराय, फुले, शाहू, आंबेडकर आणि जगत ज्योती महात्मा बसवेश्वर यांच्या विचाराशी एकनिष्ठ राहून बौद्ध धम्म जीवनात सर्वश्रेष्ठ मानून शील सदाचाराचे आचरण करून महाविद्यालयाला एक वेगळ्या उंचीवर नेण्याचे कार्य त्यांनी केलेले आहे असे गौरव उद्गार यावेळी संस्थेचे अध्यक्ष आदिनाथ सांगवे यांनी व्यक्त केले.