लातूर स्त्री रोग संघटना व बरमदे हॉस्पिटलमध्ये आयोजित

लातूर : लातूर स्त्री रोग संघटना आणि बरमदे हॉस्पिटल औसा रोड लातूर यांच्या संयुक्त विद्यमाने लातूरच्या बरमदे हॉस्पिटलमध्ये आयोजित करण्यात आलेल्या ' सुरक्षित मातृत्व' या विषयावरील एक दिवसीय कार्यशाळेस उत्स्फूर्त प्रतिसाद मिळाला. या कार्यशाळेत लातूरसह जिल्ह्यातील निलंगा, चाकूर, शिरूर अनंतपाळ तालुक्यातील एकूण ९५ डॉक्टरांनी आपला सहभाग नोंदविला.

सेफ मदरहूड अर्थात ' सुरक्षित मातृत्व ' या विषयावर आयोजित करण्यात आलेल्या या कार्यशाळेत प्रमुख मार्गदर्शक म्हणून डॉ. अजय जाधव, डॉ. अनिशा गाला ,डॉ .आरती सिंग, डॉ. अमित उटीकर , डॉ. गिया जी. आदी मान्यवरांची उपस्थिती होती. या कार्यशाळेत त्यांनी गर्भार अवस्थेतील स्त्रियांची काळजी कशी घ्यावी, गर्भवती स्त्रियांचा आहार काय असावा, गरोदर मातेची सोनोग्राफी कधी करावी, बाळामध्ये कोणकोणते व्यंग येऊ शकते, याविषयी उपयुक्त असे मार्गदर्शन केले. विज्ञानाने केलेल्या प्रगतीच्या जोरावर आज वैद्यकीय क्षेत्रही प्रगल्भ झाले आहे. बाळाच्या जन्माच्या आधीच त्याची मातेच्या गर्भातील वाढीसह अनेक बाबींवर लक्ष ठेवणे शक्य झाले आहे. त्यामुळे ' सुरक्षित मातृत्व' ही संकल्पना आजमितीस प्रत्येक गर्भवती महिलेसाठी आणि तिच्या बाळासाठी खरोखर अतिशय महत्वपूर्ण ठरताना दिसते.

ही एकदिवसीय कार्यशाळा डॉ. मनीषा व. डॉ कल्याण बरमदे यांच्या मार्गदर्शनाखाली बरमदे हॉस्पिटलच्या सीएमई हॉलमध्ये उत्साहात पार पडली. या कार्यशाळेत डॉ. भालचंद्र, डॉ. दरडे, डॉ. मंदाडे, डॉ. तापडिया, डॉ. दाताळ , डॉ. स्वाती गोरे, डॉ. मुशीर शेख, डॉ. अनिता रेड्डी, डॉ. प्रेरणा राजे देशमुख, डॉ. प्रणिता नागुरे ,लातूर स्त्री रोग संघटनेच्या अध्यक्षा डॉ. प्रतिभा पाटील, सचिव डॉ. मनिषा बरमदे यांच्यासह जिल्हाभरातील ९५ तज्ज्ञ डॉक्टर्स सहभागी झाले होते.