चाकूरच्या सीमा सुरक्षा दलाच्या सहाय्यक प्रशिक्षण केंद्रात शपथ समारंभ

चाकूर ता.प्रः- चाकूर येथील बीएसएफ,सीमा सुरक्षा दलाच्या सहायक प्रशिक्षण केंद्रातून प्रशिक्षित झालेले १७२ जवान देशसेवेसाठी सज्ज झाले आहेत. या जवानांचा परेड शपथ समारंभ शनिवारी २१ डिसेंबर रोजी छत्रपती शिवाजी महाराज परेड ग्राऊंडवर दिमाखात पार पडला.या शपथ परेडची सलामी सहायक प्रशिक्षण केंद्र,सीमा सुरक्षा दल, चाकूरचे महानिरीक्षक विनीत कुमार यांनी घेतली.
या भव्य शपथ परेडचे नेतृत्व हवालदार हिमांशू यांनी केले.या जवानांचे प्रशिक्षण दि.५ फेब्रुवारी २०२४ ते २१ डिसेंबर २०२४ पर्यंत ४४ आठवडे होतें.जवानांचे मूलभूत प्रशिक्षण महानिरीक्षक विनीत कुमार यांच्या सक्षम मार्गदर्शनाखाली आणि देखरेखीखाली पूर्ण झाले.यामध्ये महाराष्ट्र, हरियाणा, राजस्थान,बिहार व पंजाब या राज्यातील जवानांचा समावेश आहे.या प्रशिक्षणादरम्यान या जवानांना शारीरिक कार्यक्षमता,शस्त्रे,दारुगोळा,फिल्ड,क्राफ्ट,नकाशा वाचन आणि फिल्ड इंजिनियरिंगचे प्रशिक्षण देण्यात आले आहे. या शिक्षणाशिवाय अंतर्गत सुरक्षा कर्तव्य,सीमा व्यवस्थापन, कायदा आणि मानवाधिकाराचेही प्रशिक्षण देण्यात आले आहे.

चौकट

यावेळी जवानांना संबोधित करताना महानिरीक्षक विनीत कुमार म्हणाले की,प्रशिक्षणानंतर त्यांना भारत-पाकिस्तान आणि भारत-बांगलादेशच्या विशाल सीमेच्या सुरक्षेसाठी तैनात केले जाईल.हे सैनिक भारताच्या सीमेवरील कठीण प्रसंगांना तोंड देण्यास सक्षम आहेत.सीमा सुरक्षा दलात पाठवून आपल्या शूर पुत्रांना देशसेवेसाठी समर्पित करणाऱ्या त्यांच्या पालकाप्रती महानिरीक्षक विनीत कुमार यांनी कृतज्ञता व्यक्त केली.यावेळी त्यांनी परेड मैदानावर उपस्थित अभ्यागत,विशेष पाहुणे,मान्यवर,शाळकरी मुले आणि प्रसारमाध्यमांचे आभारही व्यक्त केले

चौकट

" या समारंभात प्रशिक्षण कालावधीत उत्कृष्ट कामगिरी
करणाऱ्या प्रशिक्षणार्थीना चाकूरच्या सीमा सुरक्षा दलाच्या सहायक प्रशिक्षण केंद्राचे महानिरीक्षक विनीत कुमार यांच्या हस्ते पारितोषिक देण्यात आले. प्रथम क्रमांक १९० मधील हवालदार सोनपाल यांना सुवर्णपदक आणि ट्रॉफी देण्यात आली कॉन्स्टेबल अनिल कुमार चौहान यांना सर्वोत्कृष्ट पदक, सहनशीलतेतील सर्वोत्तम कॉन्स्टेबल उमेदा राम, फायरिंग कॉन्स्टेबल हिमांशू कुमार यांना सर्वोत्तम पदक प्रदान करण्यात आले.कॉन्स्टेबल हिमांशूला भव्य परेडचे टॉपर पदक आणि परेड कमांडरची ट्रॉफी मिळाली.