पुण्यातील विश्व मराठी संमेलनात लातूरच्या बालकलाकारांचे जोरदार सादरीकरण...

लातूर - महाराष्ट्र शासनाच्यावतीने ३ रे विश्व मराठी संमेलन पुणे येथे आयोजित करण्यात आले होते. यात जगभरातून मराठी माणसे सहभागी झाली होती. महाराष्ट्राचे मुख्यमंत्री, उपमुख्यमंत्री, खासदार, आमदारांसह अनेक विशेष निमंत्रित मान्यवर साहित्यिक, कलाकार, युट्युबर्स व भाषाप्रेमी विविध सत्रामध्ये मंचावर सहभागी होते.
तीन दिवस चाललेल्या या संमेलनात एक सत्र बालरंगभूमी परिषदेसाठी देण्यात आले होते. त्यात वरील दिग्गजांच्या रांगेत लातूरचे २५ बाल तबलावादक सहभागी झाले होते. असा सामूहिक तबला वादनाचा अनोखा अनुभव पुणेकरांनी पहिल्यांदाच घेतला. ज्ञानप्रकाश शैक्षणिक प्रकल्प द्वारा संचलित,ज्ञानप्रकाश संगीत विद्यालयाचा हा उपक्रम होता. श्री मयूर येणगे यांच्या मार्गदर्शनाखाली तयार झालेल्या त्यांच्या शिष्यानी पुण्यात विश्व मराठी संमेलनात लातूरचा झेंडा दिमाखात रोवला आहे.
लातूरच्या या कलाकारांना बालरंगभूमी परिषदेच्या महाराष्ट्राच्या अध्यक्षा ऍड. निलम शिर्के व उपाध्यक्ष ऍड. शैलेश गोजमगुंडे यांच्या प्रयत्नातून ही संधी मिळाली. आणि मिळालेल्या संधीचं मुलांनी सोनं केलं. या प्रसंगी सिने अभिनेते प्रविण तरडे, भाषा विभागाचे संचालक डॉ. शंकांत देवरे यांनी तबला वादनानंतर स्वतःहून मुलांशी संवाद साधला. त्यांचं कौतुक केलं.
या उपक्रमासाठी श्री येणगे यांना सागर कोळी, अतुल जाधव, जीवन पांचाळ, अमोल शिंदे यांनी सहकार्य केले.
या उपक्रमाचे सर्वदूर कौतुक होत असून ज्ञानप्रकाशचे श्री सतीश नरहरे, मुख्याध्यापिका सौ. सविता नरहरे, अशोक गुरधाळे, वनिता गोजमगुंडे, बालरंगभूमी परिषद लातूर शाखेच्या अध्यक्षा सुमती सोमवंशी, मयूर राजापूरे, प्रा. नवलाजी जाधव, सौ. हिरा वेदपाठक, सौ. सुवर्णा बुरांडे, श्री रवी आघाव, श्री रणजित आचार्य, ऍड. बालाजी म्हेत्रे यांनी अभिनंदन केले आहे.