प्रधानमंत्री आवास योजना २.० साठी ऑनलाईन अर्ज करावेत

लातूर/प्रतिनिधी : प्रधानमंत्री आवास योजना २.० ही सुरू झाली असून त्यासाठी इच्छुकांनी अर्ज करण्याचे आवाहन लातूर महानगरपालिका आयुक्त बाबासाहेब मनोहरे यांनी केले आहे.

ज्या नागरिकांकडे स्वतःची जागा आहे परंतु घर नाही किंवा ज्यांचे घर कच्चे आहे अशा नागरिकांना या योजनेचा लाभ दिला जातो. यासाठी लाभधारकाचे वार्षिक उत्पन्न साडेचार लाख रुपये पर्यंत असणे आवश्यक आहे. यासाठी शासनाकडून अडीच लाख रुपयांचे अनुदान टप्प्याटप्प्याने देण्यात येते. यात लाभधारकाने शौचालयासह ३० चौरस मीटरचे बांधकाम करणे आवश्यक आहे.

महानगरपालिका हद्दीतील ज्या लाभधारकांना या योजनेसाठी अर्ज करावयाचा आहे त्यांनी https://pmaymis.gov.in/PMAYMIS2_2024/PMAY_SURVEY/EligiblityCheck.aspx यावेबसाईट किंवा सेतू केंद्रावर जाऊन अर्ज सादर करावा.अर्जा सोबत आधार कार्ड,कुटुंबातील सदस्यांच्या आधार कार्डचे तपशील, अर्जदाराचे आधारशी जोडले असणारे बँक खाते क्रमांक, बँकेचे नाव, शाखा, आयएफएससी कोड, उत्पन्नाचा दाखला,एस सी,एसटी किंवा ओबीसी असतील तर जात प्रमाणपत्र, जमिनीचे दस्तऐवज अर्थात सिटी सर्वे उतारा किंवा सातबारा, प्लॉटिंग उताऱ्यासोबत बिनशेती आदेश व बिनशेती लेआउट आणि महानगरपालिका आठ अ उतारा या सर्व कागदपत्रांच्या मूळ प्रति वेबसाईटवर अपलोड करणे आवश्यक आहे. या कागदपत्रांची पूर्तता करून इच्छुकांनी योजनेचा लाभ घ्यावा, असे आवाहन आयुक्त बाबासाहेब मनोहरे यांनी केले आहे.